政情：文化區入夜變死城 草地海邊空間冷清

喺民政及文化體育事務委員會尋日召開嘅會議上，議員陳凱欣直呼西九龍文化區下晝6點之後猶如「死城」，草地、海邊公共空間咩嘢都冇搞；佢又話如果有團體想租草地搞活動成本好高，甚至整爛少少草地都唔知要賠幾多錢咁話；委員會主席鄭泳舜都話有議員因為咁而有好慘痛嘅經歷。陳凱欣提議政府要出租攤位畀人搞剪紙、個人表演藝術等等，提升文化氣息咁話。文化體育及旅遊局副局長劉震話會同西九文化區管理局討論，希望可以善用地方空間喎。

至於西九文化區嘅交通問題一直都係議員蘇長榮非常關注嘅嘢，佢提到依家免費接駁車根本冇辦法滿足人流需要，搞到市民焗住搭的士，質問當局點解唔安排收費巴士。劉震惟有話公共收費交通要同運輸署安排，睇來都仲係解決唔到蘇長榮嘅關注事項啦。