政情：中大校董會低效能 梁美芬力數3缺陷

中大校董會一直畀人批評話校內校董成員過多，而校外校董成員太少，擔心咁會導致「校校相衞」。因為咁3個議員校董就提出，建議將中大校董會嘅成員人數約減少三分之一，由55人減至34人，重組後嘅校董會校外成員佔大多數，與校內成員比例約為2：1，即校外成員佔23人，校內成員只有11人。

梁美芬同意要改革校董會嘅組成人數，直言中大改革一直應該做，佢話係「宋達能報告」後，好多大學都着手處理校董會嘅問題，反而中大「落後」。事實上，大學普遍都至少有50%嘅校董係校外校董成員，但係中大只有17%係校外校董成員，所以好明顯睇到「（中大）遲早會出管治問題」。

有份提出私人草案嘅議員鄧家彪都話8間UGC院校只係差中大未做，張宇人話「應做而未做係事實」，而中大營運開支八成係公帑，所以要有足夠監管先得。

對於有意見話校董會以教職員為主，先可以保證到學術自由同院校自主。梁美芬話咁係「混淆視聽」，唔理解咩叫監督。佢話監督就係唔要自己人去查自己人，仲話除非校內校董唔當自己係中大人。如果佢哋係喺中大嘅管理架構嘅編制，甚至仲要收工資，係唔可能做到好似校外人士一樣，可以用客觀、冇偏差、冇偏袒嘅角度去實行所謂公眾期望嘅監督。佢又提到其實本身有人提出，唔應該再有校內校董，就係當時希望喺校董會內，可以聽到校內嘅意見，所以才保留部分校內校董會，行個中間位。

至於有人話中大依家國際排名同學術表現都唔錯，點解仲要改。梁美芬就批評中大管理層嘅管理能力、駕馭危機能力，同教育年輕學生能力欠奉。佢又話管理層係縱容之後就縱壞，不點名話中大之前有一個前學生會嘅會長，用粗言穢語鬧中國人，但當時校方好似唔敢鬧一句，反問如果唔係縱壞，2019年反逃犯條例修訂事件點會搞到咁大單啊。所以佢認為教小朋友，絕對唔可以只係要學業成績好。

近年香港流失咗好多海外學者，梁美芬話呢個問題係要正視，但佢以2021至2022年為例，話當年361個流失，但之後都可以補番晒，仲多咗145個。