昔日東方政情：蒙古草原美景 梁敬國偷閒扮文青
講起蒙古，好多人嘅腦海就會浮現天蒼蒼、野茫茫，風吹草低見牛羊嘅塞外景色。商務及經濟發展局前副局長梁敬國，早前喺社交平台上載多張佢置身蒙古草原嘅相片，貼文話發吓思古幽情、扮文青咁話。到底佢今次旅程，有冇背熟幾首邊塞詩咁呢？
其實梁敬國此行嘅主要目的，係代表香港建造商會前往蒙古國首都烏蘭巴托，出席由亞洲及西太平洋承建商國際聯合會（IFAWPCA）所舉行嘅會議，期間就趁空餘時間體驗草原風光。對港人而言，蒙古係比較陌生嘅國度，有網民好奇一問，當地用乜嘢語言溝通？佢就話感覺當地頗注重對外關係，不但有國際學校，接待單位嘅工作人員同導遊嘅英語水平都唔錯。
雖則溝通無大障礙，不過佢形容開會開到呆若木雞，惟有飲支蒙古礦泉水、食粒大會朱古力醒吓神。勞工及福利局前局長蕭偉強見佢呻到樹葉都落埋，於是語帶戲謔咁留言「提起精神上朝，大汗就駕到！」而佢就回應話「收到師兄！」
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
