消費券資格抽查 市民難分真與假

就近日坊間有傳，指市民若對抽查不予回應，本月16日將不獲發本年度第二期電子消費券嘅講法，政府日前澄清話，就算3個工作天內未回覆消費券抽查，巿民亦會再次收到秘書處或承辦商嘅短訊及來電。只要巿民按時回覆並提交證明文件，就可獲安排盡快補發消費券。冼卓嵐日前拍片，指當局雖然有特定電話號碼發出短訊，巿民可透過政府網頁所列資料以核對來電真偽，不過上咗年紀嘅巿民未必識得咁做；加上主動向巿民致電並非政府部門嘅慣常做法，巿民容易誤以為來電有不軌企圖而置之不理，其實並不難理解。

冼卓嵐又提到巿民出門旅遊，手機換上當地嘅電話卡，如何收到政府嘅來電抽查？而限定3個工作天回覆，時間未免太短，佢舉例話採用傳閱通過嘅區議會文件，政府至少都預一個禮拜啦。儘管巿民可要求消費券秘書處安排補發，但無論網上或致電查詢，往往等到暈、等到躁，即使親身「踩上去」秘書處，排隊應該係免不了，然而一般基層打工仔，邊度有咁多時間呢？

就政府抽查巿民獲發消費券資格嘅做法，冼卓嵐認為善用公帑，無可厚非，但善用公帑同方便巿民，兩者未必係對立，究竟有冇較好嘅方法去進行資格核查呢？而巿民是否在港居住，政府理應具有出入境紀錄，何必疊床架屋咁抽查？佢慨嘆消費券已經派咗好多次，然而政府似乎未有吸取經驗之餘，過程仲愈來愈煩，予人感覺係派都派得孤寒！其實派消費券嘅目的都係想巿民開心啫，難明政府搞到連派錢都可以招惹怨言。