政情：集氣撐港隊 議員齊集立法會

有「亞洲車神」之譽嘅黃金寶，話希望大家可以多啲參與亞運會競賽、賽事，仲話「獎牌一定有，顏色唔知道」，不過如果獲得大家嘅支持鼓勵，相信獎牌嘅顏色就會同「堅仔」一樣喎。

咁「堅仔」咩嚟㗎？原來係一隻黃色嘅獅子，係一位知專設計學院同學嘅作品，而獅子就係代表「獅子山精神」。立法會主席梁君彥都話，今次係「集氣」，希望香港運動員愈來愈「堅」，屢創佳績，全力以赴，為港爭光咁話，今次香港仲派出860名運動員，參加劍擊、游泳、武術、划艇、羽毛球等賽事添！

至於目前懸空嘅體育專員，人選方面會傾向揀公務員，定係退役運動員？文化體育及旅遊局局長楊潤雄話會綜合考慮，人選須具相當體育行政經驗，冀可帶領香港體育界政策向前發展，所以「好難話邊類人」。