政情：跑返立會講理 蘇長榮索晒氣

話說議員蘇長榮喺發言嘅時候上氣唔接下氣，講咗唔夠兩句就要抖一陣，之後仲要飲水去抖順條氣，唔講仲以為佢講緊急口令，先搞到喘晒氣。當然佢唔係表演急口令喇！而係趕返會議廳講釋放勞動力嘅議案先搞成咁。

佢回覆本報話自己之所以咁喘氣，係因為啱啱喺政總出席完活動，之後跑返嚟發言。佢話已經預計議員周小松會講耐少少，但估唔到畀自己預計嘅時間早咗一、兩分鐘，排喺周小松後兩個嘅佢就要跑返嚟。就係為追趕呢一至兩分鐘，令佢咁趕，未抖順條氣啫！