政情：滾軸溜冰考平衡 狄志遠玩得謹慎

話說日前狄志遠同另一位議員林振昇，應邀出席將軍澳一項有關小童滾軸溜冰嘅活動，期間狄同林兩人皆穿上護膝同滾軸溜冰鞋影合照。不過狄後來喺社交平台上載相片，可見佢玩滾軸溜冰動作生硬，好似就嚟要跌咁，同佢平時玩長跑嘅靈活身手大相逕庭。佢就解釋話自己嘅平衡力向來欠佳，況且上咗年紀，擔心跌親之後手尾長，所以玩得好謹慎。

至於點解唔識平衡，都玩滾軸溜冰呢？狄志遠就話出席嘅活動都以年輕人為主，為咗同其他人打成一片，就試吓玩。但佢如果話得自己一個，就未必會再試啦。