政情：承諾貪口爽 留英蘇逸恒：打都唔返港

蘇逸恒喺貼文中話「3張嘢畀人問得最多係英國生活點？而一開始係諗住返香港，但好快就改變主意，依家打我都唔返去。算命佬們話，我要到45歲左右就會好好，呢幾年都算好差，如果係真嘅，咁我覺得差既日子都好得很。」

生活點好法？佢話偶爾雖有吵鬧，但同家人安好，女朋友亦喺身邊，仲養咗貓，有瓦遮頭唔使交租、大量假期，有部車仔周圍去吓，儘管間中腰痠背痛，但健康無礙，太無聊就買張平平地機票飛吓，唔願出門就打吓機、睇吓劇。撇除收到地政罰款單，其他都好得很。

蘇逸恒、時任民主黨副主席梁翊婷同黨內「元老」李華明3人，喺2021年擅自以個人名義支持黨外立法會選舉候選人，涉違黨紀被投訴。該黨中委會喺2022年2月中開會通過紀委會革除蘇、梁兩人嘅黨籍，李則凍結黨籍半年。

因違法佔領中環行動案被判囚8個月、緩刑兩年嘅民主黨副主席李永達，喺2021年8月初秘密赴英後，時任中委嘅蘇逸恒曾貼文暗指李「叫人衝、自己鬆」，惹得民主派「35 +」初選案被還押嘅前副主席尹兆堅大動肝火，唔點名批評蘇係「契弟」，令黨內矛盾浮出枱面。