政情：李世榮撐女排 回想自己打學界

唔好睇佢咁大隻，就以為佢唔多鍾意郁動，其實佢曾經係一名運動健將，足球、籃球同排球都難佢唔到，就因為有打排球，所以佢亦係中國女排嘅忠實球迷，支持咗好多年咁話。

對於中國女排輸咗畀意大利，作為資深球迷嘅佢就分析，今次戰績唔太理想，可能係因為呢次出賽嘅球員新人比較多，大賽經驗可能唔夠意大利，所以有咁嘅賽果。

睇住自己支持嗰隊輸波固然失落啦，但好彩佢都同到中國女排嘅前隊長惠若琪影張相，叫做集到郵，但估唔到算係高大嘅佢，企喺一米九嘅惠若琪隔籬，真係好似縮咗水咁喎。