政情：ChatGPT錯不停 葉劉變劉慧卿 幫徐英偉變性

葉劉尋日喺社交平台貼文，話說前日去咗黨友議員何敬康喺東區嘅地區辦事處開幕禮，而黨友出嘅新聞稿同樣係試用ChatGPT幫忙進行英文翻譯，但係呢次翻譯出嚟嘅內容錯漏百出，令人啼笑皆非。

點解？葉劉舉例，話篇稿將行政會議召集人講咗係另一個議員。嘩！好錯喎。事關行會召集人只有一個，就係新民黨主席葉劉；仲話凡係提及新民黨，都變咗做民主黨，而新民黨主席係劉慧卿。

沒有最錯，只有更錯。葉劉話勞福局局長寫咗係羅致光，羅致光已經退下火線，冇做局長成年喇，更離譜嘅係民政及青年事務局局長竟然係「徐英偉小姐」！小姐？人名搞錯，性別都錯。徐英偉係前局長，新局長冇錯係女性，名為麥美娟。葉劉話唯一正確詮釋嘅，只有發展局局長甯漢豪。

ChatGPT錯得咁交關，葉劉認為「餵食」AI嘅資料庫不但未有更新至最新版本，大部分原材料亦明顯係嚟自西方傳媒，對中國香港政壇同政治人物毫無認識，目中似乎並無建制派，佢覺得咁實在好可笑同充滿政治偏見，仲話佢要花唔少工夫「執正」稿件，先可以「出街」呀！竟然被稱為「小姐」，徐英偉都有留言話正因為咁，AI唔可以取代人嘅智慧，仲好幽默咁自稱係「徐小姐」。

其實本港多間大學亦曾因禁唔禁學生用ChatGPT惹起爭議，最後個別大學都放行，而黃錦輝亦曾經提醒過學界切忌倚賴。不過，經過葉劉呢個「實例」，睇嚟一眾議員要醒爬，咪貪方便，以為用ChatGPT就乜都搞掂，否則出錯晒嘢肯定會淪為笑柄。