笑看天下：中美俄印 關係大變

中國大國崛起，主動廣結友好，拓大經濟貿易，實現中國式現代化，促進「共同富裕」，喺外交上自不免要更積極進取。要知道，截至2022年底，中歐雙向投資存量已超逾2,300億美元。去年，歐洲對華投資約121億美元，大幅增長70%，新增投資集中於汽車、新能源、機械設備等。李強訪德法，豐收滿滿。法國堅持戰略自主，不支持「脫鈎斷鏈」，李強與馬克龍會談後，兩人共同見證航空、太空研究、核能等領域多項雙邊合作文件嘅簽署，冀望唱響中歐「合作共贏」主旋律。

另一方面，印度總理莫迪國事訪問美國，受到美國總統拜登高規格接待，兩人喺白宮進行兩個半小時閉門會談，會後發表聯合聲明，拜登強調「美印兩國是全球最親密的夥伴之一」。該聲明特別提到，東海及南海緊張局勢加劇，之不過，維持國際法及航海自由嘅重要，決心抵制任何單方面顛覆多邊體系嘅企圖。阿哥，畫公仔唔使畫出腸，呢番說話又係針對中國，盲嘅都感覺到。印度靠攏美國，意味部署印太嘅美國海軍艦隻，日後可停靠印度港口維修等便利；此外，印美關係既然係「全球最親密」，意味印度今後必漸疏遠俄羅斯，而今後中俄關係又必靠近一步，以抗美印圍堵！