政情：麥美娟家庭飯敍 呻父親眼中得孫女

麥美娟前日喺社交網站貼文，話最近忙到天昏地暗，連前日係父親節都唔記得咗，好彩嘅係仲趕得切訂位食晚飯。雖然晚飯係佢安排嘅，但形容爸爸一如以往眼中只有佢嘅寶貝孫女，即係麥美娟嘅9歲姪女，仲形容成餐飯好似佢哋兩個「撐枱腳」，包括佢在內嘅其他家人「搭枱」嘅。

唔單止咁，就連佢細佬為影嗰張「影後」嘅相，都發現由爸爸頭部嘅傾斜角度，好明顯係望住孫女。佢話印象中自從9年前開始，佢同爸爸嘅合照中間總有呢位細麥小姐，而爸爸就曾經講：「見金唔笑，見銀唔笑，見到孫女哈哈笑。」

麥美娟話媽媽30多年前過身後，爸爸一直父兼母職照顧仔女，而爸爸係傳統型父親，所以屋企人嘅感情唔係好似電視劇中相依為命嘅父女、父子般溫馨，反而係有好多互動，因為爸爸嘅嗜好係「日哦夜哦」，而仔女嘅強項係「駁咀駁舌」，佢甚至覺得可能就係因為呢種互動關係，訓練到仔女嘅思想相當敏捷喎。