政情：蝴蝶破繭 梁子穎反思生態災難

可能你會覺得佢好重口味，但其實佢只係收養蝴蝶幼蟲啫！佢話上個月27號早起去天台處理落大雨之後嘅植物，就發現咗5條蝴蝶幼蟲，形容係「五福臨門」咁話。眾所周知蝴蝶係一種「變態」嘅動物，而喺早幾日梁子穎就話佢收養嘅蝴蝶蟲開始變態啦，佢都慶幸好彩畀咗個「五星級的家」同收養咗佢哋，不然連日來嘅大雨一定會影響到佢哋，仲好有可能遇害添！

咁由發現幼蟲到破繭而出需要幾長時間呢？梁子穎就用咗3個禮拜左右，佢話前晚終於見到蝴蝶蟲蛹變成黑色，大概喺凌晨時分破繭而出，佢仲成功拍攝到出世嘅過程，所以尋日朝早就見到其中兩隻變成美麗嘅蝴蝶啦，佢形容破繭成蝶嘅過程非常震撼。

蝴蝶雖然美麗，但梁子穎都冇諗住繼續養，而係等到唔再落雨嘅時候將佢哋放歸番大自然，繼續繁殖下一代，都可以回歸自然嘅生態系統，幫助其他物種繁殖。佢都反思話自己嘅日常生活其實都係破壞緊自然生態平衡，佢仲特別強調將來日本嘅大規模排放核污水會「一發不可收拾」咁成為「人類歷史上最大的危機和威脅」，話到時全球人類都會受到影響，所以佢呼籲大家積極反對日本排放核污水咁話。

佢都反思依家人類好需要嘅食水正被污染、天氣出現反常情況、氣溫不斷上升、水平線亦隨之上升而導致陸地被淹沒，所以叫人類我們「好好地停一停、想一想」，做多啲嘢保護大自然珍惜資源、改變生活習慣、用多啲可再生能源、唔用即棄用具、做好垃圾分類回收重用。