政情：典禮台晤施俊輝 林順潮嘆時光飛逝

林順潮喺社交平台貼文，話星期一（12日）晚喺典禮台上影大合照，見到施俊輝亦都同場，咁就想起2004年6月，佢為第七屆「香港傑出學生」擔任頒獎嘉賓時，典禮台上嘅得獎人就係2003年香港中學會考十優狀元嘅施俊輝！佢話估唔到昔日嘅菁菁學子，後來投身社會成為一名政府官員。

睇番當年嘅舊相，身穿校服、手捧獎狀同獎盃嘅施俊輝一臉青澀，林順潮嘅外貌則無大改變，之不過歲月如流，昔日嘅學生哥早已踏出校門，成家立室仲做埋爸爸添。林順潮話香港嘅未來，要視乎點樣培育下一代，佢深信施俊輝可以為香港嘅教育及未來作出貢獻。