昔日東方政情：蝦碌梁美芬 叫梁君彥做主人
議事堂裏面，間中都會出現「蝦碌」嘅場面。立法會尋日繼續辯論中醫發展嘅動議，議員梁美芬發言支持中西醫結合，但估唔到臨尾嘅時候發生口誤，將主席梁君彥講成「主人」，尷尬到極。
主席都有前科 喊錯簡慧敏
主張推動中醫發展嘅梁美芬，話30多年前就已經發現中醫藥能根治佢「林林審審」嘅病症，又話內地除咗輸入西醫學之外，一直都無拋棄中醫學嘅研究，以至今日嘅中西醫結合係做得好好。而當佢話「希望香港喺呢方面急起直追」，就唔小心講成急起「極」追。
去到發言嘅結尾，更口快快咁稱呼坐喺主席台嘅梁君彥做「主人」。雖然梁美芬知道講錯，惟一言既出，覆水難收，佢只有即刻更正話「主席」。至於被稱為「主人」嘅梁君彥，面上依舊一貫木訥嘅表情，按程序邀請下一位議員發言。
議員一時口快噏錯嘢時有發生，梁君彥都有前科，事關佢之前亦一度將議員簡慧敏誤稱為周慧敏。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
