支援脫節唔到位 照顧者壓力爆煲

有關慘劇再次反映「以老護殘」、「以殘護老」、「以殘護殘」等現象係倫常悲劇嘅源頭，改革照顧者措施刻不容緩；政府若不想方設法，增加支援，同類慘案恐怕會陸續有來。呢，立法會福利事務委員會尋日就討論支援照顧者。有議員批評政府為照顧者提供嘅服務和社會需求脫節，又質疑照顧者資訊網站嘅成效；亦有議員要求政府向關愛隊增撥資源，合作處理照顧者問題。當局就回應並透露，目前正和荃灣及南區關愛隊商討照顧者安排。

事實上，香港人口老化問題嚴重，加上港人又特別長壽；令人憂慮嘅係，多達六成一被照顧者年齡65歲或以上，當中75歲或以上佔逾四成。照常理推測，隨着人口老化，被照顧者老齡化嘅比例只會進一步推高。統計處指照顧者人口至少達45萬人，香港社聯則統計社會上有超過112萬照顧者，不過至今仍未有照顧者實際人口嘅數據。看來政府應切實做好統計，以配合人口施政對策，面對倫常悲劇一再發生，政府咪一味靠估，尤其不要「講多過做」！

其實明眼人都知，被照顧者最需要係獲得入住院舍嘅機會，先可以獲得更適切照料，無奈咁多年來，院舍依然嚴重不足，一位難求，好多老人家等唔到已「蒙主寵召」了！嗱！政府喺去年施政報告中提出多項措施，以加強支援照顧者，包括建立一站式照顧者資訊網站、設立照顧者支援專線、把關愛基金下四項經濟援助計劃恒常化、增加暫託服務名額等。睇落好似幾多「支援」，嚇得吓人！之不過，乜嘢網站、乜嘢支援專線，對被照顧者根本係嘥氣，皆因姿勢多於實際也！

有社福界議員直斥當局為照顧者提供嘅服務和社會需求脫節，要求加大力度，又直言不認為政府推出24小時熱線和網上資訊可以完全解決照顧者壓力，佢問政府會否效法部分團體設立地區支援中心，以幫助照顧者喺地區服務。要言之，議員所反映，無不指政府支援全不到位。勞福局副局長回應，指將視乎相關團體成效再作決定，承諾會研究安排喎！港產官僚至叻「拖」，凡事唔踢唔郁！「治政之要在於安民，安民之道在於察其疾苦」，依家倫常慘劇一單又一單，官老爺要體察民瘼所在，又怎可以口惠而實不至？執政為民，要以百姓之心為心，做實事。行行好，唔好再左推右擋咯！