昔日東方政情：立會迎武林中人 少林弟子訪問
立法會議事堂係議事嘅地方，可以話係靠把口，到咗以前泛民主派喺立法會瘋狂拉布嘅嗰段日子，就講口又講手，搞到好混亂，到咗呢屆剩番一個非建制派議員，風平浪靜，點知日前竟然嚟咗班打得之人。吓！要平亂咩？
鄧家彪帶隊參觀
打得之人？真係好打得㗎。查實喺香港復常後，多咗好多市民、團體甚至內地省市都會去參觀立法會，日前就有班着住灰色袈裟，嚟自河南登封市嘅少林弟子來訪，但佢哋唔係嚟教立法會保安武功㗎喎，都係嚟參觀立法會。
負責做導賞員嘅議員鄧家彪帶佢哋遊立法會同認識立法嘅工作。正所謂少林功夫醒、少林功夫勁，鄧家彪都唔執輸，即席叫班少林弟子喺立法會平台花園耍咗套少林功夫。見到少林武功咁威武，鄧家彪都話想學，笑言自己呢排都發生唔少事，所以都諗住學番一招半式喎。唔通係因為之前屋企被爆竊，所以想學功夫自保？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
