政情：陳克勤神器包糉 一隻僅需兩分半鐘

陳克勤話喺前沙田區議員董健莉等各個義工嘅「專業指導」下，加上「包糉神器」嘅協助，好輕易咁用2分30秒就完成一隻愛心糉，原來所謂嘅「包糉神器」係倒轉嘅沙漏形狀，所以使用者可以先用糉葉整好個形，再依次放入糯米同綠豆蓉。佢仲問點解自己包嘅糉細隻啲，董健莉包嘅就大隻啲呢？到底點解呢？原來係同身形有關。

原來今次係佢第二次包糉，第一次係喺上個禮拜同義工喺大埔包，而且嗰次因為冇用神器，所以包完嘅糉係扁嘅，好似舊番梘咁，佢話今次有個神器就容易固定，終於可以整到三角形嘅糉，而且速度夠快咁話。