政情：BB搶閘來了 林琳同老公開心笑

林琳話34周半嘅波波一出世就喊得好有氣力，Standby嘅兒科醫生都話好掂，證明波波嘅肺功能好得，唔使擔心，又形容波波出世就擘大個口，係個開心笑寶寶嚟。

情況嚟得好快，林琳話上個禮拜三開始無啦啦有假性宮縮，禮拜五睇咗醫生，叫佢多啲瞓床休息吓。去到前日下晝，主診醫生出完差返嚟即刻見佢，亦都係建議休息吓先。點知BB由前晚8點開始，就唔畀爸爸媽媽瞓覺休息，子宮係咁收縮直到尋日凌晨4點半，佢終於頂唔順去咗醫院，而手術亦都好順利。

林琳形容BB已經唔想再等，決定提早同爸爸、媽媽、各位Auntie同Uncle、哥哥、姐姐、爺爺同嫲嫲見面。