笑看天下：再說戰爭不確定性

「江東子弟多才俊，捲土重來未可知。」杜牧指項羽雖然胸襟唔夠廣闊，但若然佢能夠再回江東重整旗鼓，話唔定仲可以捲土重來。而王安石根據自己嘅理解，認為項羽失敗已成定局，即使江東子弟仍在，亦未必肯為佢賣命，是以佢話：「江東子弟今雖在，肯與君王捲土來？」老朽較認同王安石嘅觀點，蓋時移世易，人心亦會隨時間而改變。老朽昨日引克勞塞維茨嘅《戰爭論》，提到曠日持久嘅戰爭，會出現難以預料嘅事故或差錯，同時還有其他因素如天災或外來援助，令戰爭充滿不確定性；事實上，這亦可解答王安石嘅疑問。