政情：過境拗簽證受氣 甘文鋒轉航企抵非

話說甘文鋒要到津巴布韋開會，香港並無航班直接可達，於是就計劃乘搭甲航空公司由香港前往印度孟買嘅航班，然後喺孟買機場同一客運大樓轉乘乙航空公司飛往津巴布韋嘅客機。為咗轉機過程更順利，出門前佢透過網絡預先辦理孟買方面嘅登機手續，兼且只帶手提行李上飛機，務求抵達孟買機場之後，只需移步往另一個登機閘口即可接續餘下旅途。

之不過，當甘文鋒準備登上飛往孟買嘅航機，就遭到甲航空公司嘅阻止，理由係佢欠缺印度嘅簽證。佢大惑不解，話事前查過孟買轉機毋須簽證，況且轉機過程毋須經過入境關卡。而對方就話轉機免簽證，只適用全程皆乘搭同一航空公司！甘文鋒不服，但又深感繼續爭論只係浪費時間。於是佢喺網上搜尋，發現另有航機由香港飛往埃塞俄比亞，繼而喺該國首都轉機往津巴布韋，二話不說立即購買機票，一於「另闢蹊徑」咁話。

儘管將原先購買嘅機票退票，發還金額大打折扣，而新路線前往津巴布韋，出發時間較原來安排遲咗一日。但甘文鋒抵達當地後，仍可趕及進入保護區近距離觀賞野生動物，不快心情即一掃而空，跟住過兩日就前往維多利亞大瀑布。佢話大瀑布太令人震撼，足足睇咗3轉，話係鬼斧神工亦不為過。