政情：去過立會又有落區 楊永杰中招

楊永杰喺貼文指出，近月有唔少議員同事，以及辦事處同事相繼確診，而自己都抱住「人生必有一中」嘅心理準備。佢話過去幾日，有前往立法會出席會議，又有落區做街站，而前日就開始喉嚨痛，但快測仍然顯示一線，尋日朝早病情未有好轉，再做快測即現兩條線。

雖然佢話會透過線上處理議會工作，但難免要喺屋企休息幾日，又一再為同事、立法會秘書處同街坊帶來不便感到抱歉！