政情：瞓喺度為AED示範 梁君彥拒就範

梁君彥話今年3月有議員透過口頭質詢問關於AED機嘅事宜，咁立法會梗係要「義不容辭」起「帶頭作用」咁話，除咗原有9部機之外，依家仲喺顯眼位置增設16部機添。

佢希望議員每個議辦可以擺一個喺門口嘅時候，會計界議員黃俊碩就話佢有，唔知係咪因為黃俊碩答得太快，梁君彥就以為個質詢係黃俊碩問嘅，黃俊碩澄清番其實係林哲玄問嘅，仲有人插嘴話叫梁君彥帶頭瞓喺度示範吓，但梁君彥唔制，話主席得一個，議員有80幾個，暗示叫議員示範好過啦！

簡介會上介紹AED係一部簡單易用的儀器，就算「未學過，都識用」；但梁君彥覺得當遇上十萬火急嘅突發情況，最重要嘅並非救人技術，而是救人嘅信心，不過唔講唔知，原來議員陳凱欣喺做傳媒時就已經考咗AED證，咁佢應該好有信心啦！佢同漁農界議員何俊賢（高佬賢）聽完簡介會都即時提出希望可以喺議辦設置AED機。