政情：$2乘車優惠 促打擊濫用招話柄 陳健波：冇違法使乜驚?

早前觀塘前區議員梁翊婷嘅網上短片，質疑相關福利開支每年達百億元係「幻想」，又話與其喺長者嘅交通支出斤斤計較，不如着眼喺基建工程過千億港元嘅超支金額仲好。

陳健波尋日喺網上上載嘅片段亦不點名反駁梁翊婷嘅講法。陳健波話同大家嘅共識都係支持$2乘車優惠，但加重刑罰同抽查只係針對非法使用乘車優惠嘅違法者，而佢講嘅非法使用$2搭車優惠係指唔合資格人士，即60歲以下人士，而唔係合資格長者同殘疾人士，目的就係要保障正當使用者權益唔受影響。佢話相信政府一定會做，因為條數實在太大，但係究竟點做，仲係研究階段，無論人哋講乜，都唔好當真，如果係正當使用者而唔係非法使用嘅違法者，使乜驚？

對於有人話相關開支每年頂多係30億元，佢形容「無知就特別大膽」，其實政府喺2023/24年度就已經申請67億元做$2優惠，而且增加得好快，以為頂多30億元，明顯係低估咗最新發展同嚴重性，佢批評如果唔查清楚，就亂咁噏，誤導市民，好多民怨就係咁產生，市民要靠自己去查證。

講到應該先去處理港珠澳大橋、沙中綫、機場三跑過千億元超支，陳健波話實情係港珠澳大橋超支15億元，沙中綫超支108億元，三跑係由機場自己負責，根本冇超支，所以3個例子加埋都係123億元，同過千億元差好遠，仲話「真係信佢一成就差唔多。」佢仲話無論有冇超支，同打擊非法行為，根本係兩件事，點解唔可以一齊做？

其實，濫用$2乘車優惠嘅情況確實存在，當局喺上周回覆議員書面質詢都話疑濫用嘅個案，舊年逾4,000宗，雖然個案數字下跌咗，但情況未杜絕。正如陳健波所言，政府會點做？大家要拭目以待嘞！