政情：旅保銷售入行難 姚柏良倡放寬門檻

為咗旅客喺旅途上有更全面嘅保障，旅遊業界一般都會建議旅客買旅遊保險，而售賣旅遊保險嘅旅行社都必須有旅遊保險代理商負責人（RO）同旅遊保險代理，先可以銷售旅遊保險。但喺2019年起，保監局實施新嘅監管同發牌制度，修訂咗對旅遊保險代理商負責人同旅遊保險代理嘅資歷要求。喺新安排下RO需要擁有學士學位、具備至少5年旅遊代理業務嘅經驗，仲要包括至少兩年管理經驗，而旅遊保險代理就需要DSE5科達到2級或以上成績，包括中文或英文同埋數學。

姚柏良就話收到業界反映，依家唔少有經驗嘅RO同旅遊保險代理出現流失，喺銷售旅遊保險上有一定困難，所以希望保監局喺處理業界申請嘅時候，盡量畀酌情權，容許佢哋以資歷代替學歷，以減低業界做RO嘅難度，等佢哋可以易啲賣旅遊保險。