政情：輸入外勞爭議大邵家輝橫額被破壞

批發及零售界議員邵家輝喺地區懸掛嘅宣傳橫額上周遭到毀壞，雖然唔知邊個係「破壞王」，但佢認為若果破壞嘅動機係針對輸入外勞嘅話，咁就枉費心機啦，畢竟損壞一面橫額，係唔會改變香港勞工短缺嘅事實。

話已報案盼勿再以身試法

邵家輝喺社交平台上載被毀嘅橫額相片，當中可清楚見到佢嘅肖像遭到鎅爛。由於橫額斗大咁寫住「各行各業欠人手，輸入外勞莫遲緩」，咁就難免令人惹起，搞破壞嘅人係不滿主張輸入外勞嘅猜測。佢話被毀橫額需要拆除，但香港人手短缺嘅情況依然存在，各行各業面對「請人難」嘅問題未解，例如近日政府發放消費券、「開心香港」活動同五一長假期，好多市民同遊客出街消費，但唔少商戶礙於人手緊張，往往出現「有生意都無人手接」嘅情況。

就僱主「請人難」嘅現象，邵家輝主張倣效澳門，容許獲批工作簽證嘅內地居民即日來回香港，以紓緩本港人手短缺問題。佢又話已就橫額被毀一事報案處理，盼涉案者勿再以身試法。