政情：又有議員中招 缺席預算案投票

周小松尋日喺社交平台貼文，慨嘆疫情3年終於失守，話前晚突然覺得喉嚨痛，又覺得身體有啲唔舒服，於是嗱嗱臨去快測，結果發現自己真係「中咗招」。佢話立法會大會尋日恢復二讀辯論同三讀《2023年撥款條例草案》，本來會去開會同支持草案，但礙於身體抱恙，必須留喺屋企休養，無奈首次缺席大會，希望盡快康復繼續喺議會為工友發聲。佢仲話近期患上新冠或流感嘅人數都有上升，呼籲市民要注意好衞生，保重身體。

幾個鐘頭之後，陳永光亦透過社交平台宣布自己染疫嘅消息。佢上載呈現兩條線嘅快測棒相片，話因為確診嘅關係，未能出席尋日嘅立法會會議，惟有「遙距支持」草案咁話。佢仲寄語大家保重，保持健康。睇番上個禮拜，EQ中招後就係陳永光用視像進行遙距診症同開藥，點知隔幾日就輪到自己中招嘞！有網民好奇一問，醫生或中醫師得悉自己確診係點樣診治？陳永光就回答話會服用自己開嘅藥。

中招嘅仲有民主黨前副主席兼觀塘前區議員梁翊婷，佢日前就透過視頻話已病咗幾日，而染疫頭一日喉嚨痛兼周身唔舒服，醫生話佢若非染上新冠，就有可能患上感冒。後來佢返到屋企做快測，確認自己中咗，初時以為食咗醫生開嘅藥、瞓完一覺會好番啲，點知發燒持續多日，即使服用退燒藥都無大作用，喉痛、頭暈、口乾、鼻水、咳嗽等病徵齊發，可謂苦不堪言。佢話朋友圈裏面，唔少人都中過兩次招，儘管佢一直都力保不失，然而當政府宣布解除口罩令，佢決定唔戴口罩，結果就中招嘞，仲畀人取笑話終於都做咗「新人類」添！佢話今次疫潮不容輕視，呼籲大家出街要戴番個口罩。