政情：爭埋單跌斷頸 許華傑搵國手醫病

許華傑尋日喺Facebook突然話自己受傷，不過都有幾個好彩位，例如受傷嘅位置不高不低、不深不淺；武漢同香港兩地都幸運地搵到唔輕易出手嘅杏林國手幫佢醫治等等，佢仲話其實自己整傷咗兩個禮拜都唔知道，因為期間冇出過大事，都冇觸及中樞神經咁話。

咁究竟佢點樣整親？原來係因為佢清明節時去普寧拜山，夜晚同親戚食飯後心急走去埋單，點知落樓梯時跣親。原因咁令人哭笑不得，好彩最後都冇事，佢話依家做咗手術，已經冇咩大礙，恢復在望啦！佢嘅老友勞工處副處長、喺疫情期做過駐武漢經貿辦事處主任嘅馮浩賢都有留言，話依家先知原來咁大件事，祝佢早日康復，話要一齊喺武漢食小龍蝦咁話。