政情：倒U圖咩意思何俊賢考民智

現代社會嘅圖標，設計上愈來愈簡潔。漁農界議員何俊賢喺社交平台同網民玩「標示猜猜遊戲」，但見佢上載嘅相片，倒U字嘅圖案裏面，一左一右分別有小朋友同大人嘅輪廓。佢呼籲已知答案嘅朋友請唔好即時開估，只要話知道就得嘞，話想睇吓香港人嘅智慧喎。

究竟呢個圖標係代表乜嘢意思呢？有人猜測圖標係指，必須由大人陪同下進行；然而亦有人問，莫非叫人小心拐子佬？不過更多人係估，係可以攜帶小孩進入嘅男洗手間；然而有人就話，圖標係指兒童救生衣。至於何俊賢自己又點睇呢？佢話驟眼望落，似阿爸帶個女去玩氣球，而小妹妹個姿勢仲玩得好開心添！咦，照佢咁講，又真係幾似喎！之不過，並唔係正確答案囉。

原來係兩用救生衣

何俊賢揭曉謎題，話有人估得好接近，但無人精準咁講到個名，答案其實係common lifejacket，即大人細路都啱用嘅「兩用救生衣」。佢話呢個係香港現正使用嘅圖標，乘搭往來長洲嘅渡輪就見到㗎啦。