政情：宴會菜名取自小說 尚海龍拍案叫絕

原來尚海龍小時候就已經鑽喺被窩裏面睇武俠小說，佢話睇見冰雪聰明嘅俠女親自烹煮菜餚畀師父品嘗嘅描寫，不期然就想像書中女俠，哪怕為佢呢個「龍哥哥」做番一道菜都好吖。而前晚宴會嘅菜式，又再勾起佢過去睇武俠小說嘅回憶，譬如《二十四橋明月夜》呢個咁詩意嘅名堂，就係原隻金華火腿挖出24個窿，放入豆腐球之後蒸熟；而《玉笛誰家聽落梅》，就採用羊羔坐臀、小豬耳朵、小牛腰子、豚腿肉及兔肉等5種肉類拼成。

單係睇食材，就知道唔係一般家常小菜，到底味道如何，怕且要食過至知，然而杯觥交錯間，腦海即呈現武俠小說嘅世界，尚海龍用三個字總結晚宴嘅評價「吃美了」。