政情：周身痛幾聲咳葛珮帆確診

隨住市面復常、口罩令解除，專家宣布新冠肺炎已變風土病，疫情高峰期嘅景象似乎已成過去，但其實呢種病毒並未消失。日前到內地考察嘅議員葛珮帆（EQ），返港後發覺老公染疫，其後連佢亦一同「中招」。佢喺社交平台貼文，話疫情3年，最終失守。

話說EQ周一（24日）返抵香港，就見到老公有幾聲咳，初時以為感冒，點知佢翌日確診。去到前日（26日），EQ開始覺得自己病病哋，做快測顯示一線，於是返立法會開大會，但後來開始有幾聲咳，擔心自己真係中招，所以喺議會裏面冇發言，急急腳返屋企，結果尋日做快測呈現代表中招嘅兩條線。EQ就強調自己前日喺大廳逗留唔夠30分鐘，一直有戴口罩，同旁邊嘅議員陳仲尼、郭玲麗都頗有距離，佢話基本上冇接觸過人嘅。

陳永光幫手遙距診症

EQ話染病後周身痛，感覺好病、好辛苦。幸好佢嘅黨友陳永光係中醫師，透過視像幫佢遙距診症同開藥，相信呢幾日都要留喺屋企養病咁話。