昔日東方政情：斥外判團隊倒米 何俊賢自薦做聯繫
資源運用不當，真係會幾激氣。漁農界議員何俊賢（高佬賢）尋日喺立法會大吐苦水，指發展局推出一啲造地計劃嘅時候，除進行勘察工程，仲會搵社區聯絡隊幫手收集當區居民嘅意見，睇吓有咩需要幫助，如搬遷補償之類。誰知原意係減少矛盾嘅做法，竟然變成針對政府、搞「軟對抗」，都可謂倒行逆施啦！
高佬賢話記得發展東北嘅時候，呢啲政府請番嚟嘅外判團隊，曾經策動居民前往佢嘅議員辦事處，要求商討賠償金額，由於佢唔係政府官員，唔可以為賠償提供答案，於是畀人斥責「無用」、「廢」，然後拉隊去政府示威。
重申資源投放喺有用嘅地方
高佬賢慨嘆，有人為咗更多賠償，不惜發起聯署、搞軟對抗。佢又話好辛苦先至取得興建多層豬場嘅共識，唔想努力付諸流水。
一再重申「不如將資源畀咗我，我幫政府做聯繫」嘅高佬賢話曾經同有關當局反映過，指呢啲人唔可以用，佢強調資源投放喺有用嘅地方，應該係搵人解決溝通協調，而唔係激化矛盾。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
