政情：梁福元牽牛耕田玩復古 冀新生代悟出粒粒皆辛苦

梁福元話近年唔少好友帶同子女到訪，赤腳踏入泥濘田內插秧及割禾，為咗加強體驗傳統耕作模式，咁就要出動牛隻啦。儘管使用犁田機，效率無疑係高得多，但佢認為務必要令新生代理解到昔日先輩務農嘅方式，繼而再同現今嘅農業科技比較，方凸顯人類智慧之進步，明白盤中飧得來不易，更加珍惜每粒米飯。

時屆「穀雨」，梁福元話代表已進入種植稻米嘅最佳日子，同埋意味春天快將完結。雖然漫長嘅炎夏快將來臨，但佢期待半年之後，兩款元朗大棠絲苗米進入收成期，約莫中秋前後就可以打穀曬穀。