政情：入境處暴雨演奏 樂隊堅毅勝人一籌

話說入境處樂隊尋日應邀為消防處結業會操進行演出，然而期間風雲色變，狂風暴雨突如其來，天文台更發出黃色暴雨警告，但樂隊成員仍緊守崗位，無懼風雨繼續演奏，表演完畢後全場「拍爛手掌」，現場嘉賓同埋觀眾都企起身鼓掌致意，大讚入境處樂隊成員堅忍不拔，即使面對風雨如磐，亦矢志完成演出。

據了解，今次入境處樂隊派出35名樂手參與表演，亦係樂隊首次派員為其他紀律部隊結業會操演出。佢哋除咗演奏《義勇軍進行曲》同埋入境處部門歌曲《心向前》之外，仲演奏重新編曲嘅銀樂版消防處部門歌曲《心比火熱》，而呢首曲亦係首次公演。