政情：兼兩職相輔相成 容海恩又出庭

話說高等法院上訴庭尋日就開庭處理陳真案，即係東區前區議員趙家賢畀人「咬耳仔」單案嘅上訴許可申請，估唔到庭上居然見到Eunice。原來佢係去做資深大律師余承章嘅副手，幫忙出庭處理案件。Eunice話自己其實一直都仲有做大律師嘅工作，包括刑事同民事嘅案件，不過時間就唔多，可能一個月都係得大約3至4日會出庭，而尋日都係見無會開所以先出庭。

被問到打兩份工會唔會好忙，佢就話時間分配到就得，同埋覺得女性都應該有自己嘅事業，況且法庭同議會嘅工作息息相關，有咗法庭嘅經驗，例如最近嘅西九走犯案咁，佢都可以畀到意見政府，可謂係「相輔相成」咁話。