政情：李世榮反映 香港號碼內地無法認證

香港同內地恢復通關之後，唔少港人都返去內地旅行或探親。喺內地電子支付普及嘅情況下，唔少同內地日常衣食住行有關嘅應用程式，都要用到內地嘅支付工具。正正係因為咁產生咗唔少問題喎，議員李世榮話近日收到唔少市民求助，話用香港手機做唔到實名認證，用唔到呢啲應用程式，所以佢就聯同另一議員陳學鋒去信政府，要求政府同內地部門協商解決問題。