政情：教路北上攞駕照 郭偉强飲廢水講笑

講笑啫！咁大個人邊有咁唔小心呀！話說佢哋飲飲吓嘢，郭偉强唔知係咪最近有「中年危機」無啦啦好感慨咁問陸頌雄「中年飲廢水有咩感受」？講完都忍唔住笑咗出嚟。跟住佢哋就話內地都好多新嘅品牌，同香港有啲唔同，雖然物價係高咗，但相對香港都係平啲嘅。之後佢哋仲開始介紹自己手上杯飲品，郭偉强就話自己杯好平都係淨係需要25蚊（人民幣），跟往陸頌雄就即刻話，咁大杯真係飲到瀨尿，而郭偉强都唔執輸，即刻回應話「瀨咗」。

搞完笑嘅陸頌雄之後正經番少少，介紹咗自己嗰杯係椰汁拿鐵嚟，十幾蚊啫，仲話自己其實喺香港好少飲喎。

講番佢哋申請攞車牌，陸頌雄都親身試咗部自動化嘅身體檢查機器，睇吓隻眼同肌肉反應咁，佢仲話好新奇，係電子政務嘅方便，建議香港取吓經。跟住仲遇到單突發嘅求助個案，原來有位港人喺搞車牌時咁啱無內地慣用嘅支付工具，所以畀唔到錢。佢哋就即刻代佢繳費，幫呢名港人解困。