政情：處理廚餘大滯後 垃圾徵費打折扣

周曉嵐指家庭一旦煮食，難免產生廚餘，而香港處理廚餘嘅能力相當之慢，好多大型屋苑都未具備處理廚餘嘅物流系統。佢話將廚餘放入紫色嘅收集箱並唔困難，問題係廚餘喺儲存或處理過程中，有機會孳生異味或昆蟲，甚至惹來鼠患。如何於指定時間將廚餘送往處理或分解嘅物流程序，實在至關重要，可惜有關工作試咗好耐，亦做咗唔少研究，仍未搵到最合適，最方便巿民嘅收集模式。

佢又提到鄉郊居民處理廢物嘅情況，指撇除家居垃圾，其實喺住所附近收集嘅枯枝枯葉或泥土，往往佔咗垃圾當中一定嘅數量，若果日後落實垃圾徵費嘅話，村民棄置嘅枯枝枯葉會否當作家居垃圾呢？佢話諸如此類嘅細節問題，有關當局仍未好好解答咁話。