政情：陸瀚民拍視頻 求精簡吸年輕人

陸瀚民話第一集，佢會夥同青委會顧問談論一下「國家安全」。話題聽落頗嚴肅，但佢認為港人對「國家安全」嘅概念十分模糊，其實國安涉及嘅範疇好廣泛，連極地同深海都包括在內，真係點止政治軍事咁簡單，可以話有排講呀！而其他諸如住屋、就業、學業、創業等話題亦將會陸續有來。由於傳播對象係年輕人，佢話每集視頻會儘量做到簡而精，時間唔會太長，約5分鐘左右，同埋會採用輕鬆嘅表達手法，至於具體效果如何，就要留意下月初首播啦！

為培訓新一代嘅青年領袖，陸瀚民話青委會正籌備政治研修班系列講座，打算由下個月開始，邀請專家學者或政商界人士擔任演講嘉賓，以加深青委會成員對各項民生議題或香港政治形勢嘅見解。另外又邀得立法會主席梁君彥下周二出席青委會活動，分享提升國安意識，商討加強青年發展工作方向。