政情：陳易希返母校談科技 盼支援概念落地

陳易希指香港作為國際金融中心，如果可以大力咁發展Fintech（金融科技），相信有助提升競爭力，況且科技企業喺香港嘅定位會日趨重要。對於港府近年銳意發展創科，佢表示大方向係正確，然而之前嘅數碼港，雖然有好多唔錯嘅想法同初創企業，但礙於政策支援不足，導致無法「落地」而流產。

佢主張港府應擬定更好嘅Regulation（法規），成立多啲諮詢委員會，開放市場推進研發，鼓勵中小科企嘅產品推廣，配合大灣區嘅人力、以及科技資源，將本地嘅科企產品推向國際市場。佢指出好多國家如新加坡係行得比較前，建議港府要敢做敢為。

提到AI帶來嘅創新與未來，陳易希指AI參照人類嘅神經網絡去思考、去創作，認為一定會幫助我哋嘅社會不斷進步；儘管短期內有機會取代部分人嘅工作，但佢堅信AI難以完全取代人類。

至於喺中學層面該如何應用AI，又或者中學生應否掌握AI技能，陳易希指自己持開放態度，更勸喻教育界應及早畀學生去使用，有咗AI喺教育方面嘅幫助，如ChatGPT，同學學習嘅速度同能力會更上層樓。佢舉例話以前寫文章可能需要兩個鐘，依家只需要列幾個要點，畀啲資料就可以完成。之不過，佢話最緊要係「大膽假設，小心求證」，事關AI嘅答案唔一定全屬正確，但係點樣令同學恰當咁運用，樹立正確價值觀先至更重要。