政情：陳沛良勸改善施政 打消青年移民決定

陳沛良出席一個網上節目時話，香港發展係要靠一代一代咁努力先得，而最重要嘅傳承就要靠青年人，所以政府要喺施政方面做得更好，令年輕人見到希望，覺得自己可以通過努力就有上流空間，喺有滿足感嘅情況下，佢就話年輕人自然會願意留港工作咁話。

年輕人離港問題之外，都有一部分人因為2019年反對修訂《逃犯條例》事件受到影響，陳沛良話其實好多年輕人本質唔係壞，所以社會都要容許佢哋改過，畀個機會；佢都覺得政府都要多多關注兒童、青年嘅心理健康，好似因為疫情導致佢哋冇社交生活，復常之後就有恐懼，所以無論係議會定政府，都要諗下點樣畀多啲資源去支援，令年輕人可以喺好嘅環境下成長。