中醫地位待提升 政府咪再唔做嘢

政府就成日掛在口邊要銳意發展中醫，於施政報告中提出多項政策，亦有政黨提倡成立「香港中醫中藥發展局」。查實醫管局協助推行中醫服務都有15年，各大學亦已推出中醫課程近20年，消息指政府已「知悉」相關建議，並「有意考慮」成立喎！阿哥，政府對中醫發展嘅關注度明顯不足，好多嘢如果上心，就不會蹉跎歲月啦！

政府又被彈連發展中醫嘅相關配套和政策尚未完善，譬如現行法例及專業守則規定放射技師及醫務化驗師，只可接受由西醫及牙醫等人員嘅轉介，而不能接受中醫師轉介，相關政策連改善時間表都冇；政府提出嘅「一人一家庭醫生」亦未有明確表示市民可選擇中醫，呢啲擺到明係偏頗，唔好忘記，修讀大學嘅中醫科目年期與西醫看齊，即需時6年之久，畢業後亦須先通過執業試方可合法行醫，為何卻連「轉介」都冇資格？也就難怪業界對此也有微言。

本屆政府成日強調會帶給市民「會做事、做成事」嘅政府，之不過，對於發展中醫行業，尤其係提高中醫地位，倒予人講多過做嘅感覺，有道是「紙上得來終覺淺，絕知此事要躬行」！政府雖然早於2018年成立中醫藥處，負責喺政策層面統籌和促進香港中醫藥發展，但有議員表示，中醫藥處規模其實好細，因只有大概5個人，而且處長級別僅為首長級丙級政務官，難以達到促進中醫發展嘅目的。議員指政府若要推廣中醫，期望能將其升格為「中醫中藥發展局」，以賦予更多嘅資源及權力，亦可用更高級別嘅專員去推動及推廣中醫中藥嘅發展。名正才能言順！

有消息指，政府已「知悉」相關建議，並「有意考慮」成立「中醫中藥發展局」，但主要屬推廣中醫作用，更多像「香港旅遊發展局」而非「醫管局」性質。呢嗱！唔怪之得連轉介X光片，都話淨係可以轉介四肢骨骼，如此把中醫「看扁」，當佢哋係江湖賣藝跌打佬？認真豈有此理！阿哥，宰相必起於州部，猛將必發於卒伍。既然有心發展中醫，「開位」就咪咁小家啦！要尊重中醫並給予肯定，政府咪學斑鳩打架，賣弄花屁股！要畀啲魄力做實事，推動中醫長遠發展和提升地位！