政情：港府訂KPI推創科 議員質疑做到有幾多

黃錦輝日前出席另一議員鄧家彪嘅網上節目，鄧話唔少科研機構都覺香港嘅基礎研究好出色，但係就難落地同普及。黃錦輝話呢個問題政府都知嘅，而喺成立咗創新科技局後就已經好大轉變，但仍然係靠上游拉動政策，直至推出消費券，就令到搞創科嘅都可以賣到啲嘢出去，能夠下游拉動，到咗上屆政府就做咗規劃式改變，例如確定要發展生物科技、AI、金融同環保方向，再拆牆鬆綁，但因為「黑暴」而裹足不前，今屆政府就訂明大目標做國際創科中心，但佢覺得唔係行得好快，議員要鞭策吓政府。

黃錦輝話政府訂定咗大量嘅KPI，議員要睇住政府做到幾多KPI，政府講到點叻都得，講到天花龍鳳都好，議員都要睇實落地嘅有幾多。

最近坊間熱論聊天機械人ChatGPT，就連各間大學都對學生用ChatGPT有唔同睇法？黃錦輝話教育同商務議題唔一樣，ChatGPT突然咁火爆，咁多人傾，其實係因為有大孖沙入股投資，於是財經界就吹吹吹，吹到呢樣嘢好犀利，呢啲咁嘅動作喺商界經常發生，即係叫做吹噓，正如兩年前個個都吹元宇宙，其實依家已經淡化晒，所以要理解到呢啲係商業行為，當一啲新嘅嘢出嚟，啲人就製造幻想係咁吹，因為佢哋要做生意。

黃錦輝話ChatGPT對商界係有用，事關ChatGPT可以完成重複性文書工作，例如做年報，但是在情感表達上無法取代人類。鄧家彪問議員如果收市民投訴，程式能唔能夠回覆，黃錦輝就話都唔OK，因為回覆一定要有感情至得！佢冇咗呢嗰感情係唔得。

至於係咪會造成職位流失，佢認為呢啲工序確實會慢慢被取替，但新工種會嚟，所以年輕人要經常裝備好自己、學習好，唔可以經常翹住隻手，以為已經識呢樣嘢就算，唔使再去進步，因為世界係變緊，尤其係AI世界入邊，日新月異，除非係等住畀人淘汰。