政情：讚7欖好睇 陳仲尼戴定頭盔

尋日就係一連3日嘅國際七人欖球最後一日作賽日，陳仲尼把握尾場機會同太太、前歌手區海倫嚟感受吓氣氛，佢哋仲「落場」玩添！不過，當然唔係落場比賽喇，而係落場玩「Cosplay」啫！陳仲尼就戴咗武士頭盔，而太太就戴咗個維京戰士嘅頭盔。雖然套武士裝好似同七欖無咩關係，但見到佢哋咁玩法，就知現場氣氛都唔錯！

陳仲尼話有唔少海外遊客嚟咗，認為呢個係香港復常之後重要嘅國際賽事，亦成功展現咗香港國際都會魅力及活力喎。佢仲話香港嘅成功秘訣之一，從來都係國際化，所以政府要繼續透過舉辦國際大型賽事或活動做國際化大都市，而且要強化海外宣傳工作，等香港繼續成為令人嚮往嘅國際都會。