政情：街市生魚紮紮跳 葉劉大讚貨新鮮

唔止生魚夠生猛，其他貨品都好新鮮，葉劉就幫襯一生果檔購買兩箱「淡雪」士多啤梨，話90蚊嘅售價非常便宜喎。其實喺呢個街市啟用前，苦於社區設施不足嘅東涌居民只有光顧由領展經營嘅街市，欠選擇之餘價格仲好昂貴添！結果喺街坊同地區組織多番爭取下，食物環境衞生署以臨時街市嘅形式，嚟紓緩街坊買餸難嘅問題。雖然唔係永久性，但葉劉相信呢個臨時街市，會存在一段極長嘅時間。

雖則葉劉唔係東涌嘅街坊，但有關東日街市嘅資訊，佢都知之甚詳，形容裏面麻雀雖小五臟俱全，乾濕貨應有盡有，但唯獨暫時欠缺燒臘檔咁話。