政情：平價團爭食兩餸飯 楊永杰勁彈

議員楊永杰尋日喺立法會前廳交流會向官員出示幾張相片，話近來出現唔少「平價團」、「劣質團」接載遊客到平民食肆幫襯兩餸飯，並且「攻陷」街市同熟食市場，嚴重影響基層市民嘅日常生活。佢呼籲當局要加強同內地有關部門溝通協作，聯手打擊「劣質團」之餘，亦須安排指定食肆同規定用餐標準，同埋要打擊假冒偽劣產品、規管珠寶同中成藥銷售，務求令遊客有一個良好嘅體驗。

實際上，議員江玉歡近日收到土瓜灣區嘅居民反映，話唔少旅遊巴出現喺區內專做內地遊客生意嘅免稅店或商店附近，喺上落班時間同周末特別容易造成行人路擠擁。佢尋日喺當區實地視察，就見到唔少旅客喺街角集體吸煙，話明白當區居民嘅憂慮，畢竟旅遊業同市民嘅起居生活要取得平衡。佢建議旅行團應多遊真正景點，旅客來港應該要去最優質嘅路線。如果真係要到舊區或民居，係咪要了解當區嘅承受能力？同埋加強環境衞生嘅處理呢？

講起內地旅客，議員李梓敬關注佢哋喺香港遭受歧視嘅問題。佢認為應該加強宣傳「好客之道」、鼓勵市民及商戶更友善對待遊客，建議旅發局「優質旅遊服務」計劃之上，加設針對旅客友善認證計劃，佢又建議當局考慮為受到歧視或不友善對待嘅遊客設立投訴機制，冀有關措施可以改善內地遊客對香港嘅印象，加快旅遊業復常。