政情：球員證錯體 梁栢賢突有米

PY尋日喺社交平台上載，香港乒乓總會發出嘅球員證相片。佢喺貼文話「昨天收到我一生人第一張球員證，十分興奮！朋友話我以60多歲之齡再做初哥，勇氣可嘉，畀個Like我！」咁開心嘅事，唔少網友即刻畀Like佢。

近年PY愛上乒乓，練波都好頻密吓，有時都會打吓友誼波，難怪佢收到呢張球員證會咁開心。呢張球員證有PY醒神嘅相，仲有佢嘅出生日期，應該係私隱嘅關係，佢遮咗年份。但隔咗冇耐，佢就發現咗一件大事，就係呢張球員證竟然打錯佢個姓，變咗「粱」栢賢，有網民笑稱佢「有米」。

雖然佢年逾60歲先做運動員，但有網友話一啲都唔遲，留言話「60歲才是中年啫！仲有大把世界！」有啲網友好期待佢打公開賽，話佢可以打乒總聯賽啦，仲話可以打丁組添！亦有網友叫佢推廣香港嘅乒乓運動。