狗狗誤墮捕獸器 執法不力是縱容

之不過，又經常睇到有狗狗慘墮捕獸器陷阱，都幾諷刺。呢嗱！一名七旬翁早前喺元朗白泥村發現一隻誤墮捕獸器嘅狗狗，本欲施救，惟狗狗過驚，強行掙脫捕獸器，負重傷逃去。事隔數日，阿伯又撞到隻狗狗，今次就成功捉到佢並帶佢去獸醫診所治理。

非牟利獸醫協會表示，本周二收到有關個案。當時狗狗左後肢已慘被扯到見骨，由於狗狗已受傷多日，獸醫診症後決定即晚為佢進行左後肢截肢手術，手術非常成功，義工為狗狗改名「靚靚」，希望佢日後成為健康嘅靚靚狗！

「靚靚」喺往後日子，會接受全面嘅護理和治療，待身體狀況穩定後，冀望佢唔會出現太大嘅「創傷後遺症」，能夠重新適應冇咗後肢嘅身體！協會認為，從狗狗嘅傷口，可以想像到佢當時為咗逃脫保命，冒着左後肢可能被扯斷風險，仍拚命強行脫離陷阱，狗狗承受極大痛苦。

各位，呢單狗狗誤墮捕獸器搞到要截肢保命，絕非單一事例。根據動物義工嘅報料，3個月內至少有8宗狗狗因誤墮捕獸器而致傷殘、截肢保命。義工透露，有好多人喺冬天捕食野豬，殃及狗狗，中招地點散布城門水塘、粉嶺、屯門、大帽山等地。今年發現非法捕獸器嘅情況似乎特別嚴重，可能有啲人因為政府針對獵殺野豬政策，而令佢哋對捕獵野豬更加有恃無恐。

講到尾，本港雖然有《防止殘酷對待動物條例》，亦有《野生動物保護條例》，任何人如未經許可管有狩獵器具如捕獸器、黏鳥膠、捕獵網等即屬違法，最高可被判罰款5萬個大洋。如捕捉受保護野生動物，最高可被判罰款10萬個大洋及監禁一年。嗱！儘管有法可依，之但係咁多年嚟，殘酷對待動物及用非法捕獸器，導致唔少動物傷亡，卻鮮有見漁護署有乜檢控行動及數字公布！有關部門有法唔執行，有法即係冇法，即係縱容！一惡施者，則百惡結；一件壞事被縱容，上百件壞事就接踵發生！有法不依，壯大濫捕者個膽，多少狗狗誤墮捕獸器陷阱而受盡折磨！香港還是個愛心、文明社會嗎？