政情：殺蜈蚣犧牲大馬軼超冇咗隻鞋

過咗驚蟄，蟲蟻嘅出沒又再變得活躍。觀塘前區議員馬軼超日前落公園練跑，期間有街坊向佢求助，話見到好大條蜈蚣，位置鄰近兒童遊樂場，擔心對市民或小童構成危害，於是佢仗義出手，為民除害。然而，佢就要付出犧牲一隻鞋嘅代價！

為民除害網民讚勇

被視為五毒之一嘅蜈蚣，對市民嘅危害到底有幾大，暫且不論；但百足之蟲嘅外形，好多人見到都會覺得毛骨悚然！當時赤手空拳嘅馬軼超，二話不說就脫下右腳嘅跑鞋，用力擲向蜈蚣。遭到重擊嘅蜈蚣奄奄一息，逃竄之時竟慌不擇路，走咗入佢隻跑鞋裏面！本來係殺蟲，結果變成「捉蟲」入鞋籠，佢亦大感意外。由於顧慮蜈蚣有毒液留喺鞋內，佢惟有犧牲咗隻鞋，單腳跳返屋企。

事後佢喺社交平台貼文，話自己都算為民除害，不過就狼狽咗啲。有網民欣賞佢嘅「義舉」，留言話「咁勇呀！」