政情：出訪杭州學師議員借鑑辦盛事

香港同內地恢復通關，唔少議員早前已北上參觀某啲機構。立法會民政及文化事務委員會亦建議喺今年7月下旬，前往杭州進行職務訪問，藉此了解當地推廣全民運動嘅經驗、文化產業發展策略同措施，順道參觀有關亞運會嘅場地設施同籌備工作等。

吸取亞運會經驗

委員會主席鄭泳舜話杭州承辦2022年第19屆亞運會，舊年礙於疫情而宣布延期，但對於有份協辦2025年全國運動會嘅香港而言，就好有參考價值，事關疫情已成過去，復辦亞運會事在必行，仲好大可能係今年9月，而趁住立法會嗰時放暑假，亞運會揭幕前嘅一段時間，係到訪當地嘅良機。佢話香港銳意爭取舉辦更多體育盛事，希望訪問杭州嘅行程，可以吸收人家承辦大型賽事嘅經驗。

但佢話有關出訪只係初步構思階段，要徵詢委員嘅意見嘅，又話若果一旦成行，預計訪問杭州為時4日，但係最終要去幾多日就視乎行程而定嘞！